2014/08/12

Le 20e Conferentia International de Interlingua

       e le 14te Incontro Nordic de Interlingua

        in Löftadalens folkhögskola, Åsa, Svedia 

 

Inter le 29 de julio e le 3 de augusto 2014 amicos de interlingua se assemblava in Svedia pro ascoltar discursos e participar in gruppos de labor e conversationes in interlingua. In le vesperes nos como de costume habeva intertenimento con musica e cantos etc.


Le schola es bellemente situate presso le mar con un vista usque al pharo Nidingen al horizonte.
Tamben in le grande sala del schola on videva le mar a transverso le grande fenestras.
 

Durante le conferentia le veterano Ingvar Stenström, Svedia pronunciva un discurso concernente su maladia ocular grave, "Como viver con le degeneration del macula lutea". Iste maladia ha facite que ille non plus pote leger. Durante le discurso ille essseva adjutate per Ingrid Ivarsson, Svedia.
 Ille tamben pronuunciava le discurso "Le sonios e planos del UMI - annos in le confrontation con le realitate"

Como sempre Thomas Breinstrup esseva le plus importante persona pro maestrar le conferentia. Con su energia, cognoscentia e   optimismo ille succedeva diriger le labor assi que le conferentia creava resultatos.
Sur le photo in supra ille face notationes concernente le resultatos del gruppos de labor, un session que nos habeva in le jardin.


Un altere persona importante esseva Inger Olsson, qui non solmente esseva un bon amusator, ma tamben habeva le responsibilitate pro le inscriptiones e multe altere cargas.





Le nove membro svedese Kenneth Platter, con le pseudonymo Marcus Scriptor esseva un grande surprisa. Ille se presentava con un discurso. Previemente nos sapeva per su blog www.poemasepensatas.blogspot.se 
e per multe videos in YouTube que ille esseva un poeta qui poteva scriber in interlingua, ille mesmo ha succedite traducer poemas a in interlingua lo que non multes ha succedite. In supra ille lege le poema "Kalena".

Barbara Rubinstein, presidente del Societate Svedese pro Interlingua inaugurava le conferentia e dava le benvenita al participantes




Un die nos faceva un excursion al citate Varberg ubi nos visitava le vetule Castello e fortalessa que ha su origine in le 13 seculo. In le museo ibi nos inter alteres videva un exposition de centos de souvenires ab multe paises facite per plancas de truncos de betula. Sur le photo in supra se vide Madeleine Mahé, Francia.
Un altere die illa pronunciava un discurso multo appreciate. Illo se tractava de un viage a Grecia e su insulas. Multe belle photos esseva monstrate. 



Nostre alleviation esseva grande quando Julian Mendez, Germania, acceptava esser candidato pro le posto libere como nove secretario general de UMI. Ille es nascite in Argentina. Sur le photo ille monstra un dono ab Vladas Kazlauskas, Lithuania. Detra ille sede Elisabeth Martin, un nove membro svedese.

Ruud Harmsen, Nederland, presentava un discurso concernente  un methodo melior pro valutar le votos de parve partitos in le UE.



Un bon amusator esseva Sven Berger, Svedia, qui habeva apportate multes de su ancian instrumentos de vento. Ille quasi nos terrificava quando ille un vice con un corno de pastor surprendentemente emitteva un colpo ruitosissime.



Un nova que nos recipeva durante le conferentia esseva que Isabella Tricase in Italia compliva qualque dies retro le doctorato de prime nivello in Culturas del Linguas Moderne e del Tourismo con le thesis: "Interlingua: instrumento pro un communication international sin frontieras" Le these esseva scribite in francese.


Multe altere contributiones esserea importante mentionar ma io non ha photos de omne iste personas, e textos sin photo es tediose.