2008/08/31

Mi prime viage al estraniero

A basso tu pote audir iste lectura in le mesme tempore como tu lo lege!


In 1952, quando io habeva dece-quatro annos, io e un camerada de schola recipeva billetas de nostre parentes pro un viage con autobus a Halden in Norvegia, circa 160 km distante ab nostre urbe Vänersborg in Svedia. In ille tempore il esseva popular comprar margarina e certe altere productos alimentari in Norvegia ubi le precios sovente esseva plus basse, specialmente del margarina. A causa de isto multe companias de autobus arrangiava viages a Norvegia. Io crede que nos esseva le plus juvene personas in le autobus e nos certo non esseva interessate de compras, ma lo que nos interessava esseva un altere scopo del viage, a saper un visita al fortalessa Fredriksten presso Halden ubi le rege svedese Karl XII esseva occidite in le anno 1718. Con grande interesse nos ascoltava le historia re iste evento historic e le guida tamben demonstrava exactemente ubi le rege habeva essite quando ille esseva fusilate. Multe historicos crede que isto forsan non esseva un colpo de foco causal ma plus probabile un homocidio committite per un svedese qui odiava le guerras continue initiate per iste rege.
Quando nos retornava al centro de Halden le plus viagiatores comenciava facer lor compras in le urbe ma io e mi camerada remaneva sur le placia ubi le autobus esseva parcate. Nos besoniava alque a mangiar e vadeva a un kiosque ubi nos videva altere personas mangiar salcicias con pan e nos comprava cata uno le sue. Ma que poterea juvene pueros biber in iste urbe estranier. Quando nos demandava le venditor ille tosto demonstrava duo botilias con un forma extrememente estranie, que nos nunquam habeva vidite, continente un fluido brun, e ille nos convinceva comprar los. Nos esseva multo suspiciose ma lo faceva e vadeva al autobus con le botilias e le salcicias. Alora nos discoperiva sur le kiosque un texto multo alarmante: “Pölser” (=salcicias in norvegiano). Ma nos credeva que ille parola deberea significar le mesmo como “pilsner” (=birra in svedese). Nos nunquam habeva bibite birra e quando nos probava ille fluido brun nos lo trovava detestabile e tosto nos esseva convincite que illo certo debeva esser un forma de birra o forsan alque plus forte. Reconsiderante que nos forsan devenirea inebrietate o mesmo debeva vomitar durante le viage retro a Svedia nos non osava biber le bibita. Que facer? Nos aperiva le fenstra in le autobus e versava le fluido al guttiero quando nos esseva secur que necuno lo videva.
Isto esseva mi prime experientia con Coca-Cola. Iste bibita esseva introducite in Svedia solmente le anno sequente, 1953. Quando io ha contate iste historia a mi infantes e graninfantes illes ha ridite multo a causa de mi ignorantia incredibile.

Ascolta iste historia hic!
Si le lectura non comencia preme le button "Get this Widget" e clicca in le nove fenestra que se aperi.

Get this widget | Track details | eSnips Social DNA

3 kommentarer:

Mardy sa...

Gratias Erik, pro iste conto amabilissime!

Petro Ferrero de Hungaria sa...

Salute, Erik

Un multo bon registration sonic in un belle interlingua e in un multo bon qualitate! Congratulationes! Esque isto es ja le resultato de mi adjuta a te super le maniera de como facer registrationes per Audacity? Alora io me gaude, que io succedeva inseniar te adequatemente le maniera, proque le resultato es multo bon. Esque io pote usar iste registration tamben in alicun emission de Radio Interlingua?

Amicalmente:

Péter

Arne Duering sa...

hi, nice blog you have, i prefer interlingua to esperanto, so well done in promoting this beautiful language, i am into artlangs myself, if you want to have a look, please: eurolanguage.blogspot.com, it would be nice if you could add our blog to your list of related blogs or even join our little group on myspace: http://www.facebook.com/group.php?gid=34398729267&ref=ts , all the best from dublin, arne