2006/11/27

Miss Anatomica

Lectura audibile
In infra tu pote leger le texto e si tu desira ascoltar in le mesme tempore como tu lege tu debe cliccar sur le texto sublienate a basso del imagine con le button dextere e seliger le alternativo "Aperi in un nove fenestra" (Öppna i nytt fönster). Quando le lectura comencia tu pote minimar ille pagina e retornar a iste pagina ubi le texto es in infra.
"Miss Anatomica" es obtenite ex le libro "Dece contos" per Alexander Gode- von Aesch e Ingvar Stenström, Svedia lege. Iste libro interesssante, es vendite per Servicio de Libros UMI. Illo costa solmente 7 €.
Le adresse es http://www.interlingua.com/libros/index.html



missanatomica.wma

MISS ANATOMICA

Un juvene skeleto escappava ab le museo anatomic. Illo remaneva absente tres dies e tres noctes. A causa de su juventute e plus ancora su sexo - de facto illo esseva un skeleta - su familia se inquietava profundemente. Su matre lamentava le prime die e le prime nocte e plorava le secunde e le tertie. Su patre objurgava le prime e le secunde die e nocte e se absorbeva in pensatas umbrose le tertie. Su fratre rodeva su phalanges ungual; su oncle esseva triste e meditava; e su soror junior soniava de imitar la sed imitava su matre.
Al fin del tertie die e nocte le juvene skeleta retornava. Illa esseva morte de fatiga sed perfectemente intacte. Su matre continuava plorar, nunc de gaudio. Su patre esseva exhaurite e non poteva reprimander la. Su soror quasi moriva de curiositate, e su fratre reconstrueva su aere de indifferentia . Su oncle, le senior del familia, esseva sol a monstrar se maestro del situation. Ille tussiva levemente pro liberar e del sensation que un osso obstrueva su gurgite – e diceva:” Nepta amate….”
Alora le juvene skelata crumpeva in lacrimas e plorava e singultava e e singultava e plorava. E quando su oncle recomenciava, “Nepta amate…..”, illa ejaculava : “Io non vole ….” Sed le resto de su phrase se suffocava in singultos e lacrimas.
“Que non vole tu?” demandava alora le bon oncle. E illa , ben que de novo interumpite per singultos e lacrimas, succedeva a explicar: “Io…. Io vole…”
“Que vole tu?” diceva le oncle in su voce le plus consolatori.
“Que vole tu, nepta amate?”
Un tremor reverbera in le ossos del juvene skeleta. Con un effortio heroic illa reprimeva su lacrimas e diceva clar- e solemnemente :
“Io vole esser Miss Anatomica.”

“Tu,” diceva le oncle.
“Vole”, addeva le fratre.
“Esser,” continuava le soror.
“Miss,” adjungeva le matre.
“Anatomica,” completeva le patre.

E le juvene skeleta summarisava calme- e fortemente:
“Io vole esser Miss Anatomica. Io vole esser coronate Miss Anatomica in un concurso de beltate. Io ha vidite un tal concurso. Io ha vidite le regina del concurso, e io sape que io es plus belle que illa. Illa se vangloriava de su ephemere beltate que va perir proque illa es carnal e debe sequer le vita de omne carne. Reguarde me, oncle e patre e matre. Io es belle, e mi beltate non es carnal. Io vole esser coronate Miss Anatomica.”
Le die sequente, quando le custode del museo anatomic arrivava a pauc minutas post sex del matino pro nitidar le sala del skeletos con su aspirator de pulvere, ille trovava que un del skeletos – le plus belle del collection – esseva revestite de un costume de banio. Un estranie sed charmante surriso pareva adornar su orbitas ocular.

6 kommentarer:

Lars sa...

Illo non functiona pro me. (Se dice "opretter forbindelse til medie", "medie ændres" e "klar", ma nihil occure, anque non si io prime "play".)

Forsan esnips non functiona con Win98?

Lars sa...

Ma io poteva discargar le file e audir lo del disco dur, per cliccar "download file".

torrente sa...

Car Lars!

Forasan tu ha ration re Win98 proque io nunc sape plure personas qui pote audir e vider le files.

Erik

Francisco Forgiamonte sa...
Den här kommentaren har tagits bort av skribenten.
Francisco Forgiamonte sa...

Car Eric, car Lars,

io non ha problemas de ascoltar le belle conto 'Miss anatomica', multo ben legite/parlate de Ingvar. Mi systema de operation es xp, possibilemente le causa de non haber problemas.
Un demanda a Eric:
Es il possibile a reducer le pagina de 'esnips', como p. ex. con RealPlayer? Assi io pote displaciar le 'esnips' (como le RealPlayer) in alto al margine e pote leger e ascoltar al mesme tempore.
Hodie io ha aperite tu blog duo vices e primo startate le audio usante le un del blogs, e pois io ha seligite le secunde blog pro leger le texto parallel con le audio. Assi io anque pote commutar inter le duo possibilitates.

Salutes de Franz

torrente sa...

Car Franz!

Excusa me, io non ha observate tu commentario.
Non, io non sepe como minimar le pagina eSnips. Ma isot non es necessari si tu seque mi instructiones in le initio del post "Files audibile":
Clicca con le button dextere e selige le alternativo "Aperi in nove fenestra". Quando eSnips ha starate le lectura, o memso un poco plus previe tu pote caluder eSnips e le blog con su texto appare.
Bon successo,
Erik