Mi viage sur le Nilo

Alcun cifras:
Egypto: 1 001 000 km2 Population:81 milliones 80/km2
Svedia: 528 000 km2 Longor: 1700 km Population: 9 mililliones 21/km2
Le Nilo 7 000 km, le plus longe fluvio del mundo
Luxor - Assuan 220 km
Luxor- Le Atlantico 4300 km

In martio iste anno mi sposa e io faceva un viage a Egypto e io desira contar alque re nostre impressiones del viage. Post arrivata a Luxor nos viagiava con un nave a Assuan 220 km. Vide le mappa. Dunque solmente un multo parve parte del Nilo, ma forsan le plus interessante.

Le area de Egypto es le duple del area de Svedia ma le population es 81 milliones personas. Quasi omne personas vive al longe le costas e al longe le fluvio le Nilo, dunque le population ibi es multo dense.

Sahara es vidite in le fundo

Le Nilo es un del plus longe fluvios del mundo, quasi 7000 km longe, plus que quatro vices longe como le pais Svedia. Le Amazon es un poco plus longe e illo ha plus aqua. Un del multe fontes del Nilo es le laco Victoria in Uganda ubi un del duo brancas, le Nilo blanc, ha su origine. Le laco Victoria es equalmente grande como le insula Irlanda. Le altere branca, le Nilo blau ha su origine in Ethiopia. Le aqua del Nilo infra le grande dicas e le multe canales irrigatori hodie es multo basse, e de facto nos quasi nunquam videva naves de carga sur le Nilo. Le nave con le qual nos vadeva ab Luxor al sud a Assuan, 220 km, poteva passar profundidates de solmente 1,5 m. Luxor es situate 600 km al sud de Cairo ma ibi nos non esseva iste vice.

Malgrado que un grande parte del population vive in le valle del Nilo nos quasi nunquam videva casas al longe le fluvio. Isto a causa del famose inundationes annual lo que face casas al litores impossibile. Iste inundationes tamen nunc non es equalmente grande post le edification del dicas in Egypto e Sudan. Le litores quasi sempre esseva belle de verdura ma le deserto sablose quasi sempre esseva visibile.

Le valle verde del Nilo es multo stricte, multo sovente minus que 10 km large e a vices minus que 1 km. Le margine verso le deserto a vices es multo distincte. Il se dice que on pote star con un pede in le verdura e un pede in le sablo del deserto.

Glissar sedente sur le ponte del sol del nave que se moveva quasi silentemente, e a vices vider tracias de culturas plure milles annos vetule esseva fascinante.

Le grande sala de Karnak

Africa vermente es multo grande. P.ex. es le distantia inter Luxor e le Atlantico, circa 4300 km. E quasi tote iste distantia consiste del deserto Sahara. Solmente sablo, petras e montanias roccose, excepte alcun oasises. Malgrado isto homines ha viagiate trans Sahara desde milles de annos gratias al camelos, o plus correctemente dromedarios.

Nunc io al hasardo intende mentionar alcunes del locos intressante que nos videva ma io certo debe sublinear que isto solmente es un summario. Luxor olim habeva le nomine Thebe. Ibi il ha le Templo de Luxor e le Templos de Karnak, un vice le plus grande complexo de templos del mundo ma hodie partialmente destruite. Le via de procession inter le Templo de Luxor e le Templos de Karnak es 3 km longe e bordate de sfinxes con capites de abietes, lo que symbolisava un del plus importante deos Amon. Olim se trovava 2000 tal sfinxes al longe iste via. Le templos de Karnak ha essite enorme e coperiva un area de 25 hectares

tamben si multo es destruite il resta sufficientemente pro devenir imponite. P.ex le grande sala, 5000 m², con 134 columnas de granito inter 10 e 21 metros alte e un diametro de 3 metros. Omne columnas esseva decorate con grattamentos in forma de imagines e hieroglyphicos. In certe locos mesmo picturas ancora esseva visibile

Ma le plus impressionante esseva le statuas gigantesque de pharaones, usque a 20 m alte e excavate in granito ante le discoperta del ferro. On solmente usava bronzo e le mineral multo dur diorit. E isto occurreva ante 3-4 milles annos. Que faceva nos in Europa alora? Ben, Stonehenge esseva edificate alora.

Nos tamben visitava le templos in Edfu, solmente 2000 annos vetule, e del tempore grec, e le templo in Kom Ombo. Ibi il habeva uno del multes, si nominate, ”Nilometros”, un puteo ubi le prestres del pharao poteva vider le plus alte nivello del aqua del Nilo durante le tempore passate. Un alte nivello apportava plus alte impostos pro le fermeros. Tanto grande esseva le correlation inter le nivello del aqua e le production sur le agros.

Le colonna rumpite e non finalisate

Arrivate a Assuan non visitava un petreria ubi multe obeliscos de granito ha essite excavate. Remarcabile es que on poteva excavar un obelisco durante minus que un anno malgrado que on non habeva utensiles de ferro. Pro excavar tal grande petras on forava rangos de foramines in le roccas e batteva cuneos de ligno, preferibilemente ligno de sycomoro a in le foramines. Quando on versava aqua sur le cuneos illos se dilatava e poteva finder le rocca. Multe vices iste obeliscos esseva transportate sur le Nilo a urbes multo distante, p. ex. a Memphis, un vice metropole del pais, presso Cairo. In le petreria nos videva le famose obelisco, 42 m longe con lateres 4 x 4 metros , que non esseva totalmente excavate, Tres parietes esseva preste ma le base del grande petra jacente non esseva distachate. Un fissura habeva occurrite e dividite iste obelisco record in duo partes. Tote le labor esseva in van. On ha trovate 27 obeliscos egyptian ma solmente 6 de illos remame in le pais. Plures nunc sta in Roma, uno ante le Ecclesia de Sancte Petro.

  

In Assuan nos videva le vetule dica construite per le britannicos ante circa cento annos e le nove dica gigantesc, Le dica de Nasser, construite per le russos, lo qu esseva preste 1971. Illo creava un laco plus que 500 km longe e 300 km breve e usque a 180 m profunde, lo que apportava que milles de personas del populo nubie esseva fortiate mover a altere locos in Egypto e Sudan. Multes vive nunc in le proximitate de Assuan e nos visitava un schola in un tal vico. Le nubios parla duo linguas totalmente differente ma ha del toto nulle lingua scripte. Le inseniamento scripte in le scholas esseva in arabe.

Un del locos le plus intressante esseva le Valle del Reges que se trova opposite a Luxor sur le litore west del Nilo, ubi le sol descende, e ubi on credeva que le regno del mortos se trovava. Ibi le plus del pharaones es interrrate in cavas in le roccas vertical, sovente con entratas multo complicate pro difficultar pro robatores e on es satis secur que non omne tumbas ancora es trovate proque le entratas forsan es celate per dunas sablose. I.a. ibi se trova le tumba de Ramses II qui viveva durante le dece-secunde seculo a. Ch. e secundo multe fontes forsan adolesceva insimul con Moses. Moses habeva essite adoptate per le filia de pharao secundo le 2:e libro de Mos: 2:10. Le pharaones sempre esseva interrate con multe cosas necessari pro lor vita eterne, tamben cosas edibile e sovente cosas multo valorose. On ha trovate perfumos que ancora odora excellentemente post milles de annos.

Typic es le expression del recercator britannic Howard Carter quando ille in 1922 credeva que ille habeva discoperite le tumba de Tutankhamon e videva a in illo per un parve foramine: ”Io vide cosas meraviliose. E certo illos esseva meraviliose ma nunc omnes se trova in le Museo Egyptian de Cairo a causa de securitate. I.a. le masca mortuari de Tutankhamon que consiste de auro pur e pesa plus que 10 kg. Tutankhamon habeva solmente 19 annos quando ille moriva. Solmente le mumie de iste pharao nunc resta in le tumba in le Valle del Reges. Omne iste tresores, i.a. le masca de morto de Tutanckhamon que consiste de 10 kg de auro, se trova in le Museo Egyptian in Cairo.

In un altere valle, le ”Valle del Reginas” se trova le tumbas del reginas del pharaones. E separatemente se trova le tumba e le templo del singule pharao feminin, Hatshepsut qui viveva durante le dece- quarte seculo a. Ch. Como le altere pharaones illa sempre es designate con le barba typic pro phraones ma il ha un designo ubi on tamben vide su mammas.

Omne pharaones debeva maritar sorores. Preferibilemente le plus vetule soror e isto naturalmente apportava problemas genetic con multe maladias e damnos genetic. E isto continuava generation post generation. Le causa pro le qual illes del toto poteva superviver probabilemente es adulterio , lo que probabilemente esseva equalmente commun in ille dies como hodie. Ma isto es mi opinion private.

Le statuas de Memnon

In le vicinitate se trovava le si appellate statuas de Memnon,"le statuas cantante". De facto solmente uno ha "cantate". Ma post un renovation decidite per le imperator Septimus Severus a causa de damnos per un tremor de terra in 27 ante Chr. illo taceva. Le sono dependeva del vento que suffleva per foramines. Le statuas gigantesc representa le pharaon Amenhotep III e su regina Tiye e su matre Mutemwiya qui sta miniaturisate al latere del gambas del pharaon. Le grecos credeva que illo representava le hero Memnon del guerra de Troja lo que explica le nomina commun.. 

Le historia del pharaones que comenciva ante 5 milles annos e finiva con le historia del Imperio Roman, quando le calendario christian comenciava, e io debe admitter que io jam ha oblidate multo de lo que nostre guida narrava, ma fortunatemente il ha libros multo informative.

Le historia moderne de Egypto risca haber un developpamento catastrophic post le revolution in 2011 a causa de conflictos inter moslems fundamentalista (le Fraternitate moslem) e altere gruppos. Le tourismo nunc es reducite a 60 % e le disoccupation es enorme. Nos videva centos de grande edificios, como hoteles, ubi le labor habeva finite e multe hoteles preste esseva vacue. Ma le juvene egyptianos pare haber un confidentia pro le futuro e sonia de un nove epocha gloriose pro Egypto.